शनिबार, साउन २८, २०७९
चोर, फटाहा र भ्रष्टलाई भोटहाल्ने अनि स्वच्छ राजनीति खोज्ने उल्लू हामी कि नेता !

चोर, फटाहा र भ्रष्टलाई भोटहाल्ने अनि स्वच्छ राजनीति खोज्ने उल्लू हामी कि नेता !

चुनावमा असल र इमान्दार मानिस चुन्न हामी पनि त असल र इमान्दार हुनु पर्‍यो , होइन ?


  • स्वदेश नेपाल
  • शनिबार, साउन २८, २०७९

केशवप्रसाद भट्टराई

नेता,सांसद, मंत्री, प्रधानमन्त्री विद्वान हुनुपर्दैन । धेरै पढेको, जे विषय पनि जानेको चाहिन्न । भाषण गर्न , कुरा गर्न , कुरा फर्काउन, ओठे जवाफ लगाउन सिपालु पनि चाहिन्न ।

जनताका मनका कुरा बुझ्ने, आफ्ना मनका कुरा जनता समक्ष राख्न सक्ने भए पुगेन । अंग्रेजी फरर बोल्ने , अंग्रेजीमा भाषण गर्ने , अन्तरवार्ता दिने पनि चाहिन्न । मुलुक र जनताप्रति इमान्दार भए पुग्छ । देश र जनतालाई नढाट्ने भए हुन्छ । चोरेर, छलेर, ढाँटेर, खोसेर, लुटेर नखाने भए पुग्छ ।

तपाइँ हामीलाई एक दुइ छाक मासुभात खुवाएको, एक दुई बोतल पिलाएको मूल्य उसले राज्यको ढुकुटीबाट बाचुन्जेललाई मासुभात, जाँड पानी खान र करोड करोडको गाडी चढ्न चोर्छ, लुट्छ भन्ने हामीले नबुझुन्जेल मुलुक सधैं यस्तै हो ।

सधैँ आफ्नै खाइन्छ ,पाँच पाँच वर्षमा आउने चुनावमा एकदुई साता कसैको खाने लोभ नगरे मात्रै पनि मुलुकले असल र इमान्दार सांसद पाउँछ । इमान्दार र असलहरूले चुनावमा उठ्ने हिम्मत गर्छन् ।

टाइको गाँठो बाध्न जान्ने, सुट पाइन्टमा, अत्याधुनिक पोशाकमा सजिने पनि नभए हुन्छ । कमेज सुरुवाल ,धोती कुर्ता, दौरा सुरुवाल लगाउने भए पुग्छ । अंग्रेजी जान्ने विषय विज्ञ त निजामती प्रशासनमा भैहाल्छन् नी ।

नेता, मंत्री इमान्दार भए त्यस्तासँग कामगर्न, त्यस्तालाई सघाउन,उनीहरूप्रति समर्पितहुन हिरिक्क हुने कर्मचारी नेपालमा प्रसस्त छन् । नेताले , मन्त्रीले बेइमान खोज्ने भएकाले ती विचरा लो प्रोफाइलमा रहिदिन्छन्न ।

विदेशमा गएर ठूला ठूला योजना मागेर ल्याउन सक्ने नेता पनि चाहिन्न । दाताहरू नै इमान्दार सरकार खोज्दै आउँछन् । अनुदान , सहयोग दिने उनीहरुको नीति हुन्छ, त्यो पैसा कसैलाई दिनै पर्दछ, दिएको हिसाव संसदलाई /राष्ट्रलाई देखाउनु पर्दछ ।

उनीहरुका प्राथमिकताका भूगोल हुन्छन् , क्षेत्र हुन्छन् । नेपालमा राम्रो र सफा काम हुन्छ भन्ने भए पछि खोज्दै आउँछन् , उनीहरुलाई सफल अभ्यास , सार्थक प्रयत्नमा सहयोग गर्ने रूचि हुन्छ । नेपालको मित्रता खोज्दै आउने हुन्छन् । राम्रो काम भए पछि अन्तर्राष्ट्रिय मिडियाले समाचार बनाउँछ त्यो पढेर पनि आउँछन् ।

हामी मतदाता इमान्दार भए इमान्दार व्यक्ति हाम्रो सेवक हुन, नेता हुन , सांसद हुन आउने हुन् । रोगको उपचार खोज्न सही डाक्टर पनि त खोज्नु पर्यो । सही औषधि त खानु पर्यो ।खान नहुने कुरा त खानु भएन ।

यो चुनावलाई परीक्षण गरौँ न ! आफ्नै वरिपरीका साधारण मानिसले राम्रा र इमान्दार भनेकालाई भोट हालेर हेरौं त !

इमान्दार र स्वच्छ राजनीतिक चरित्रका आफ़ैले देखेका, चिनेका -बुझेकालाई भोट हाल्न किन सकिन्न । कम्तीमा इमान्दार प्रयास गरौँ यो पटक असफल हौंला अर्को पटक हुँदैनौ । मुलुकको राजनीतिक वातावरण नै अर्कै बन्दछ ।

चोर, फटाहा र भ्रष्टलाई आफू भोटहाल्ने अनि स्वच्छ राजनीति खोज्ने उल्लू हामी कि नेता ?

प्रतिक्रिया
सम्बन्धित समाचार
ताजा अपडेट