९ कक्षामा अध्ययनरत विद्यार्थीले बनाए पेट्रोलबिनै चल्ने मोटरसाइकल

प्रकाशित मिति : १० मंसिर २०७६, मंगलवार

बागलुङ : चिल्ड्रेन लाइफ इंलिस बोर्डिङ स्कुलमा अध्ययनरत गणेश श्रेष्ठले ब्याट्रीबाट चलाउन सकिने मोटरसाइकल बनाएका छन् । उनले पुरानो मोटरसाइकलका विभिन्न पार्ट जोडेर बनाएको सवारी साधनलाई ‘इलेक्ट्रिक बाइक’ नाम दिएका छन् ।

बागलुङ नगरपालिका २ अदालत रोडका श्रेष्ठ कक्षा ९ मा अध्ययनरत छन् । उनले ४८ भोल्टको मोटर, ४ वटा लिड एसिड ब्याट्री, एउटा १२ भोल्टको ब्याट्री, २० एम्पियरको फ्युज, १ पिस कन्ट्रोलर, १ एक्सीलेरेटर र बाइकको पुरानो फ्रेम प्रयोग गरेका छन् ।

लामो समयदेखि युट्यूबमा हेर्ने गरेको र अहिले अथक अभ्यासपछि पेट्रोलबिनै चलाउन सकिने इलेक्ट्रिक बाइक निर्माण गरेको उनी बताउँछन् । गत साउनदेखि सुरु गरेको इलेक्ट्रिक बाइक बनाउने काम अहिले बल्ल सकिएको उनको भनाइ छ ।

‘धेरैपटक विफल भए तर मनमा सक्छु भन्ने एक किसिमको अठोट र विश्वास थियो’, गणेशले भने, ‘अन्ततः म प्रयास, सोच र योजनामा सफल भएको छु ।’ उनले निर्माण गरेको इलेक्ट्रिक बाइकको विद्यालय परिसरमा सयौं अभिभावक र विद्यार्थीका बीच गुडाएरै परीक्षण र प्रर्दशनीसमेत गरिएको थियो ।

यसअघि उनले क्ल्याफ स्वीच बल्भ, स्पीकर इन्भटरजस्ता इलेक्ट्रिक समान बनाउन सफल भएका थिए । फुर्सद हुँदा साथ नयाँ नयाँ खोज र अनुसन्धानमा ध्यान दिने श्रेष्ठले भविष्यमा इलेक्ट्रिक इञ्जिनियर बन्ने सपना रहेको सुनाए । मोटरसाइकल निर्माणमा ६० हजार रुपैयाँ खर्च लागेको उनले बताए ।

विद्यालयका प्रिन्सिपल नवराज श्रेष्ठले विद्यालयका तर्फबाट केही प्राविधिक सामग्रीसहित निर्माण कार्यमा सहयोग गरिएको जानकारी दिए । ‘विद्यालयमा उनी पढाइमा मध्यम खालका विद्यार्थी हुन् तर प्रविधिमा उनको बढी रुची र लगाव छ’, उनले भने,

‘निरन्तरको लगावका कारण नेपालमै नयाँ खालको पेट्रोलबिनै चल्ने मोटर निर्माण गरेका छन्, अब हामी उनलाई थप प्राविधिक ज्ञान हासिल गर्न उपर्युक्त वातावरण र व्यवस्था गर्न पहल र सहयोग गर्नेछांै ।’

स्वदेश नेपाल मिडिया प्रा.लि.

अधक्ष्य तथा प्रधान सम्पादक : इन्द्रकुमार श्रेष्ठ

एकताबस्ती, बूढानीलकण्ठ नगरपालिका वडा नं ९, काठमाण्डौ
फोन : ०१ ४३ ७११६८
Regd No: १९५७४३/०७५/०७६

© 2017 Swadesh Nepal || Designed by appharu