शुक्रबार, पुस ३०, २०७८
नेपाली भूमि लिपुलेकबारे मोदीको अभिव्यक्ति र सरकारको मौनता आपत्तिजनक : विवेकशील साझा पार्टी

नेपाली भूमि लिपुलेकबारे मोदीको अभिव्यक्ति र सरकारको मौनता आपत्तिजनक : विवेकशील साझा पार्टी

यदि भारतको यो प्रवृत्तिको मिचाहा प्रवृत्तिको प्रतिवाद गर्न नसक्ने हो भने दूरगामी असर भोग्नुपर्ने छ !


  • स्वदेश नेपाल
  • शुक्रबार, पुस ३०, २०७८

विवेकशील साझा पार्टीले नेपालको भूमि लिपुलेकमा सडक विस्तार गर्ने भारतीय प्रधानमन्त्री नरेन्द्र मोदीको हालैको सार्वजनिक अभिव्यक्तिप्रति आपत्ति जनाएको छ ।

प्रवक्ता शरदराज पाठकले विज्ञप्ति जारी गरी मोदीको उक्त अभिव्यक्तिप्रति नेपाल सरकारको मौनता र लाचारी पनि आपत्तिजनक बनाएको बताएका छन् ।

‘कालापानी, लिपुलेक र लिम्पियाधुरा समेटेर नेपालको नक्सा जारी गरी संविधान संशोधनमार्फत निसान छापमा उक्त नक्सा राखिसकिएको अवस्थामा मोदीको अभिव्यक्ति जति आपत्तिजनक छ, त्यति नै आपत्तिजनक हाम्रो सरकारको मौनता र लाचारी पनि छ’ उनले विज्ञप्तिमा भनेका छन् ।

अन्तर्राष्ट्रिय कानुन विपरीत भारतले नेपालको सार्वभौमिकता र भौगोलिक अखण्डतामाथि लगातार ठाडो हस्तक्षेप गरेको भन्दै विवेकशील साझा पार्टीले नेपाल सरकारले भारतको मिचाहा प्रवृत्तिको प्रतिवाद गर्नुपर्ने बताएको छ । यदि भारतको यो प्रवृत्तिको मिचाहा प्रवृत्तिको प्रतिवाद गर्न नसक्ने हो भने दूरगामी असर भोग्नुपर्ने विवेकशील साझा पार्टीले उल्लेख गरेको छ ।

नेपाली भूमिमा गरिआएका सबै खाले संरचना निर्माण कार्य तत्काल रोक्नुपर्ने दह्रो अडानसहित भारतसँग अविलम्ब कूटनीतिक संवाद गर्न पनि विवेकशील साझा पार्टीले सरकारलाई आग्रह गरेको छ ।

यस्तो छ जारी विज्ञप्ति:

नेपालको भूमि लिपुलेकमा सडक विस्तार गर्ने भारतीय प्रधानमन्त्री नरेन्द्र मोदीको हालैको सार्वजनिक अभिव्यक्तिबारे नेपाल सरकारको अस्वाभाविक एवम् रहस्यमय मौनताप्रति विवेकशील साझा पार्टीको गम्भीर ध्यानाकर्षण भएको छ।

कालापानी, लिपुलेक र लिम्पियाधुरा समेटेर नेपालको नक्सा जारी गरी संविधान संशोधनमार्फत निसान छापमा उक्त नक्सा राखिसकिएको अवस्थामा मोदीको अभिव्यक्ति जति आपत्तिजनक छ, त्यति नै आपत्तिजनक हाम्रो सरकारको मौनता र लाचारी पनि छ।
कूटनीति नि:सन्देह आवेग र उत्तेजनाको विषय हैन। तर अन्तर्राष्ट्रिय कानुन विपरीत नेपालको सार्वभौमिकता र भौगोलिक अखण्डतामाथि लगातार ठाडो हस्तक्षेप गर्ने भारतको मिचाहा प्रवृत्ति पुनरावृत्त हुँदा नेपाल सरकारले समयमै आवश्यक प्रतिवाद गर्न नसक्ने हो भने त्यसका दूरगामी असर मुलुकले भोग्नुपर्ने हुन्छ।

नेपाली भू-भागमा छिमेकीको मनपरी देश प्रेमी कुनै पनि नागरिकलाई स्वीकार्य छैन। नेपाली भूमिमा गरिआएका सबै खाले संरचना निर्माण कार्य तत्काल रोक्नुपर्ने दह्रो अडानसहित भारतसँग अविलम्ब कूटनीतिक संवाद अघि बढाउन विवेकशील साझा पार्टी सरकारलाई आग्रह गर्दछ।

प्रतिक्रिया
सम्बन्धित समाचार
ताजा अपडेट