शुक्र, फाल्गुन ९, २०७६
Fri, February 21, 2020

भ्रष्टाचारको आरोपमा राजपाका दुई नेता तानिए


  • स्वदेश नेपाल
  • मङ्ल, माघ ७, २०७६

काठमाडौं । फर्जी उपभोक्ता समिति बनाएर सरकारी रकम हिनामिना गरेको आरोपमा पूर्वसांसद विश्वनाथप्रसाद यादव (बीपी यादव) विरुद्ध मुद्दा दायर भएको छ। यादवले पूर्वाधार विकास कार्यालय सिरहाका तत्कालीन कार्यालय प्रमुख सिनियर डिभिजनल इन्जिनियर राजकुमार गोइतसमेतको संलग्नतामा फर्जी समिति गठन गरी २५ लाख हिनामिना गरेको अख्तियार दुरुपयोग अनुसन्धान आयोगको आरोपपत्रमा उल्लेख छ।

सप्तरीको अग्निसाइर कृष्णसवरण गाउँपालिका–२ र ३ मा पर्ने सडक ग्राभेल गर्न किर्ते व्यक्ति खडा गरी उपभोक्ता समिति गठन गरेको अख्तियारको अनुसन्धानले देखाएको छ। पूर्वसांसद यादव, कार्यालय प्रमुख गोइत, तत्कालीन राजपा केन्द्रीय सदस्य हरिनारायण मण्डल भनिने हरि मण्डलसहित ६ जनाविरुद्ध अख्तियारले विशेष अदालतमा मुद्दा दायर गरेको छ।

पूर्वसांसद यादव सुनियोजित तवरले फर्जी समिति गठन गरी भ्रष्टाचारमा प्रत्यक्ष संलग्न रहेको पुष्टि भएको अख्तियारले जनाएको छ। उनीहरूविरुद्ध २५ लाख बिगोसहित यादवलगायत ६ जनाविरुद्ध मुद्दा दायर गरिएको छ। मिलेमतो गर्ने सोही कार्यालयका नासु भागवत यादव, राजपा नेता वीरेन्द्रकुमार मण्डल र कृष्णकुमार यादवलाई पनि प्रतिवादी बनाइएको छ।

अनुसन्धानमा पूर्वसांसद यादवको मिलेमतोमा गैरकानुनी फाइदा लिन सप्तरीको राजगढ गाउँपालिकास्थित मुतनी नदी सिँचाइ आयोजनाको काम गर्न गठित उपभोक्ता समितिका पदाधिकारीको नागरिकताको फोटोकपीमा अनधिकृत रूपमा विवरण सच्याएको अख्तियारले पाएको छ। अग्निसाइर कृष्णसवरण गाउँपालिकाको इटहर्वादेखि कनौलीसम्मको सडक निर्माणका लागि प्रदेश सरकारले भौतिक पूर्वाधार विकास मन्त्रालय जनकपुरको नाउँमा सिफारिसपत्रसमेत केरमेट गरी सच्याइएको छ।

अख्तियारका अनुसार आरोपीहरू पूर्वसांसद बीपी, तत्कालीन राजपा केन्द्रीय सदस्य हरि, वीरेन्द्रकुमार र कृष्णकुमारसमेतले एउटा प्रयोजनको लागि गठित उपभोक्ता समितिको कागजात सच्याएर फर्जी उपभोक्ता समिति गठन गरेको देखिएको छ। उनीहरूले गलत कागजात पेस गरी उल्लिखित बीपी यादवसमेत चार जना र सीडीई राजकुमार गोइत र नासु भागवत यादवसमेतले सम्झौता गर्दासमेत नक्कली उपभोक्ता समितिका अध्यक्ष, कोषाध्यक्ष र सचिवजस्ता पदाधिकारीबिनै गरेको पाइएको छ।

अख्तियारले सीडीई गोइत, नासु यादवविरुद्ध २५ लाख बिगो र २ वर्ष कैद माग गरेको छ। पूर्वसांसद यादव, हरि, वीरेन्द्रकुमार र कृष्णकुमारलाई १ वर्ष कैद र बिगोबमोजिम जरिवानाको मागदाबी गरेको छ। पूर्वसांसद यादव रातो पासपोर्ट दुरुपयोगमा समेत मुछिएका छन्।

सुर्खेत भेरीगंगा नगरपालिका–१३ स्थित साजगोठेरी सामुदायिक वन उपभोक्ता समितिका अध्यक्ष कहरसिंह नेपालीविरुद्ध विशेष अदालतमा मुद्दा दायर गरिएको छ। अध्यक्ष नेपालीलगायतको मिलेमतोमा वन हेरालुलाई पारि श्रमिक दिँदा नक्कली बिल भरपाई बनाई हिनामिना गरेको पुष्टि भएपछि मुद्दा हालेको अख्तियारले जनाएको छ। नेपालीले उपभोक्ता समूहको अध्यक्ष हुँदा विभिन्न व्यक्तिले रकम बुझेको नक्कली बिल भरपाई बनाएर आफैंले रकम लिई हिनामिना गरेको पुष्टि हुन आएको छ। अन्नपूर्ण पाेस्ट दैनिकले खबर छापेकाे छ ।

प्रतिक्रिया
ताजा अपडेट